Dumagundong ang San Jose City National High School Gym sa lakas ng hiyawan at tilian ng libo-libong manonood na dumagsa rito para panoorin ang Artista vs Knights of Columbus (K of C) Basketball Game kahapon (April 26).

Sanib-puwersa ang mga Kapamilya at Kapuso Stars sa koponan ng mga artista, kabilang sina Carlo Aquino, Joross Gamboa, Khalil Ramos, Marco Gumabao, Jairus Aquino, Jon Lucas, Hashtag Vitto, Mark Herras, Rocco Nacino, JC Tiuseco, at Jason Abalos.

Hindi magkamayaw ang fans sa pag-cheer sa kanilang mga idolo na lubhang nagpakilig at nagpasaya sa laro.

Kasabay ng mainit na panahon, naging mainit din ang labanan sa pagitan ng dalawang koponan, at natapos ang laro sa iskor na 91-77, pabor sa Artista Team.

Ang naturang aktibidad ay bahagi pa rin ng selebrasyon ng Pagibang Damara Festival 2018.